Drejtoresha e Shërbimit Informativ Shtetëror (SHISH), Vlora Hyseni, ka zhvilluar një raportim me dyer të mbyllura në Komisionin Parlamentar të Çështjeve të Brendshme dhe të Mbrojtjes, i cili zgjati më shumë se dy orë. Në fokus të diskutimeve ishte situata e përgjithshme e sigurisë në vend, me theks të veçantë te kërcënimet nga shërbimet e inteligjencës së vendeve me qëndrim armiqësor.
Sipas raportit vjetor, SHISH ka evidentuar një rritje të kërcënimeve hibride, operacioneve të influencës malinje dhe fushatave të dezinformimit. Këto aktivitete, sipas Hysenit, synojnë proceset integruese të Shqipërisë dhe nxitjen e destabilitetit. Përballë këtyre sfidave, institucioni po bashkëpunon me agjencitë ligjzbatuese dhe partnerët ndërkombëtarë.
Akuzat e opozitës
Para nisjes së raportimit, drejtoresha e SHISH u përball me kritikat e deputetëve të opozitës, Klevis Balliu dhe Flamur Noka. Ata pretenduan se punonjës të shërbimit janë infiltruar në protestat qytetare për të mbledhur informacione, të cilat, sipas tyre, i vihen në dispozicion kryeministrit Edi Rama. Opozita akuzoi institucionin për shërbim ndaj pushtetit dhe jo ndaj sigurisë kombëtare. Nga ana e saj, Vlora Hyseni i hodhi poshtë këto pretendime, duke i cilësuar ato si përpjekje për dezinformim për interesa politike.