Në Komisionin për Politikën e Jashtme, më 12 maj 2026, nënkryetarja Albana Vokshi debatoi me socialistët mbi raportin e Këshillit të Ministrave për procesin e anëtarësimit dhe integrimit të Republikës së Shqipërisë në Bashkimin Evropian për vitin 2025 dhe periudhën katërmujore janar–prill 2026.
Vokshi deklaroi se raporti nuk është realist dhe pyeti Majlinda Dhuka, ministre të Shtetit për Marrëdhëniet me Parlamentin dhe kryenegociatore, nëse edhe vetë ajo e beson atë. Sipas saj, nuk ka përparim në luftën kundër korrupsionit dhe krimit të organizuar, ndërsa asnjë kriter bazë për integrimin nuk është përmbushur.
Ajo akuzoi qeverinë për mungesë transparence: "Pse e mbani procesin e integrimit top secret dhe pse nuk ndani me publikun dhe opozitën informacion mbi negociatat dhe ecurinë reale të procesit?"
Vokshi iu referua editorialit të përbashkët Rama-Vuçiç, duke pyetur nëse ai përfaqëson një ndryshim vizioni: nga anëtarësimi me të drejta të barabarta në një model "integrimi pa vendimmarrje".
Sa i përket fondeve europiane dhe reformave, ajo ngriti shqetësimin se raporti nuk jep të dhëna konkrete mbi rreziqet për financimet nga BE. "A ka qeveria një vlerësim të brendshëm për reformat që janë në rrezik mospërmbushjeje brenda afateve të BE-së, veçanërisht për qershorin 2026?", pyeti, duke përmendur referencat kritike të Komisionit Europian për gjetjet e OLAF-it.
Një çështje tjetër kryesore ishte mosmbyllja e procesit IBAR, mekanizmi i BE-së për vlerësimin e progresit në drejtësi, luftën kundër korrupsionit dhe krimit të organizuar, si kusht për avancimin e negociatave. "Pse Mali i Zi po avancon në këtë proces dhe Shqipëria jo?", pyeti Vokshi.
Ajo përmendi edhe çështjen Balluku si test për Shqipërinë dhe vuri në dukje se qeveria prodhon raporte, por ka pak rezultate reale. Sipas saj, kryeministri Rama nuk dëshiron realisht integrimin europian.
Përditësime
Ina Vokshi përmendi rastin e Mirlindës Karçanaj si shembull i mbrojtjes nga qeveria Rama ndaj hetimeve të SPAK. Ajo pyeti: "A ia ka bërë të qartë Bashkimi Evropian qeverisë shqiptare se çështja Balluku përbën një test për Shqipërinë?"