Presidentja e Komisionit Europian, Ursula von der Leyen, deklaroi se po shënohet përparim i kënaqshëm drejt zbatimit të marrëveshjes tregtare mes Bashkimit Evropian dhe Shteteve të Bashkuara. Deklarata erdhi pas një bisede telefonike me presidentin amerikan Donald Trump.
Sipas saj, të dyja palët mbeten të angazhuara për zbatimin e marrëveshjes, me përparim drejt uljes së tarifave doganore deri në fillim të korrikut. Ajo e përshkroi bisedën si shumë të mirë dhe përmendi diskutimin për situatën në Lindjen e Mesme, ku theksoi se Irani nuk duhet të posedojë armë bërthamore dhe rreziqet për stabilitetin rajonal.
Donald Trump njoftoi se i ka dhënë Bashkimit Evropian afat deri më 4 korrik për zbatimin e marrëveshjes. Kjo marrëveshje u finalizua verën e kaluar në Turnberry të Skocisë dhe u miratua nga Parlamenti Evropian në fund të marsit me kushte.
Megjithatë, procedurat e brendshme të BE-së kërkojnë negociata ndërmjet Parlamentit Evropian dhe Këshillit të BE-së për ratifikimin përfundimtar para hyrjes në fuqi. Gjatë natës mes 7 dhe 8 majit, diskutimet maratonë mes këtyre institucioneve nuk arritën marrëveshje përfundimtare, por regjistruan përparim në disa çështje. Raundi i ardhshëm planifikohet për 19 maj.
Presidenca Qipriote e BE-së raportoi se palët mbeten të përkushtuara për dialog konstruktiv. Ministri i Energjisë, Tregtisë dhe Industrisë së Qipros, Michalis Damianou, deklaroi se synohet përfundimi sa më i shpejtë i procesit legjislativ.