Presidentja e Komisionit Evropian, Ursula von der Leyen, deklaroi se nuk mund të ketë stabilitet në Lindjen e Mesme apo në Gjirin Persik përderisa Libani është "në flakë". Kjo u tha sot në një konferencë për shtyp në Bruksel.
"Një mësim kyç i javëve të fundit është se siguria është e pandashme. Prandaj, ne u bëjmë thirrje të gjitha palëve të respektojnë sovranitetin e Libanit dhe të zbatojnë një ndërprerje të plotë të armiqësive", shtoi ajo.
Von der Leyen falënderoi Pakistanin për rolin e tij të rëndësishëm në ndërmjetësimin e bisedimeve midis Shteteve të Bashkuara dhe Iranit gjatë fundjavës. Ajo paralajmëroi se sulmet e vazhdueshme në Liban rrezikojnë të prishin gjithë procesin diplomatik.
Ajo theksoi rëndësinë thelbësore të lirisë së lundrimit në Ngushticën e Hormuzit dhe ndikimin ekonomik të konfliktit. "Që nga fillimi i konfliktit, 44 ditë më parë, fatura jonë për importet e lëndëve fosile është rritur me mbi 22 miliardë euro. **44 ditë, 22 miliardë euro, asnjë molekulë energjie më shumë", u shpreh ajo.