Një vrasje me armë zjarri ka ndodhur të dielën në mbrëmje në fshatin Majac të Podujevës, ku kanë humbur jetën Ilaz Brahimi nga Obiliqi, Miradije Gashi (73-vjeçare) dhe vetë dyshuarja Ardita Gashi (31-vjeçare).
Sipas Policisë së Kosovës, Ilaz Brahimi është gjetur i vdekur brenda një makine të parkuar jashtë një shtëpie. Brenda banesës janë gjetur me plagë plumbash Ardita Gashi dhe Miradije Gashi, e cila ka ndërruar jetë disa orë më vonë në Qendrën Klinike Universitare të Kosovës (QKUK). Ardita Gashi ka humbur jetën sot në kujdes intensiv.
Familjarët kanë deklaruar se Ardita Gashi, e dyshuar për lidhje dashurie me Ilaz Brahimin, e kishte marrë peng Miradije Gashin, e afërme e saj. Gjatë ngjarjes ishin të pranishëm bashkëshortja e djalit të viktimës 73-vjeçare bashkë me fëmijët. Burime thonë se çifti po shkonte drejt ndarjes pas krizash dhe Ardita Gashi e kishte thirrur Brahimin për takim.
Pas vrasjes së Brahimit, dyshuarja ka qëlluar ndaj Miradije Gashit dhe më pas ka tentuar vetëvrasjen, duke u mbyllur në shtëpi dhe duke kërcënuar të tjerët. Policia ka ndërhyrë për ta arrestuar.
Prokuroria Themelore në Prishtinë njofton se hetimet janë në zhvillim dhe motivi mbetet i panjohur, pavarësisht dyshimeve për çështje sentimentale. Në vendngjarje janë sekuestruar një armë zjarri, gëzhoja dhe prova të tjera materiale. Me urdhër të prokurorit, trupat e pajetë janë dërguar në Institutin e Mjekësisë Ligjore për autopsi.