Deputeti i Partisë Socialiste, Vullnet Sinaj, ka shmangur komentet përballë gazetarëve në lidhje me pozicionin e tij për Reformën Territoriale, teksa po hynte në ambientet e Kuvendit të Shqipërisë këtë të hënë. Sinaj, i cili më herët ka votuar kundër draftit të propozuar nga maxhoranca në mbledhjen e grupit parlamentar, nuk dha një përgjigje të qartë nëse do të mbajë të njëjtin qëndrim edhe në seancën plenare që pritet të mbahet të enjten.
I pyetur nga gazetarët nëse do të ndryshojë mendim ose nëse vota e tij në sallë do të jetë sërish kundër, deputeti u përgjigj shkurtimisht: “Ishte votë brenda grupit parlamentar”. Ky qëndrim vjen në një kohë kur Reforma Territoriale pritet të jetë një nga çështjet kryesore të votimit në Kuvend, për të cilën nuk ka konsensus me opozitën.
Krahas Vullnet Sinajt, edhe deputeti Erion Braçe është identifikuar si pjesëtar i grupit socialist që ka shprehur pakënaqësi ndaj draftit. Seanca e sotme plenare shënon rikthimin e deputetëve në punimet parlamentare pas të ashtuquajturës “javë e gjelbër”. Përveç reformës, në Kuvend pritet të ketë debate edhe mbi çështjen e SHISH, pas zhvillimeve lidhur me ish-drejtoreshën Vlora Hyseni.