Organizata Botërore Meteorologjike (WMO) ka publikuar raportin e fundit, ku paralajmëron se gjendja e klimës globale po përkeqësohet, me treguesit kryesorë që lëvizin në drejtim negativ. Ka pak vend për optimizëm për të ardhmen e klimës.
Çekiilibri midis energjisë që Toka merr nga dielli dhe asaj që kthen në hapësirë po rritet me shpejtësi. Ky fenomen, tregues kyç i ndryshimeve klimatike, është vënë për herë të parë në qendër të analizës së WMO-së.
Temperaturat globale vazhdojnë të rriten, oqeanet ngrohen gjithnjë e më shumë, ndërsa akujt dhe akullnajat po shkrihen me ritme të përshpejtuara. Përqendrimi i gazet serrë në atmosferë ka arritur nivele rekord, të papara për të paktën 800 mijë vjet.
Zëvendësdrejtoresha e përgjithshme e WMO-së, Ko Barrett, ka theksuar se nuk ka vend për të mohuar realitetin dhe se treguesit aktualë nuk japin shumë shpresë. Sekretari i Përgjithshëm i OKB-së, Antonio Guterres, e ka cilësuar situatën si emergjencë, duke thënë se planeti po shtyhet përtej kufijve të tij.
Periudha 2015–2025 rezulton të jetë më e nxehta në historinë e matjeve, ndërsa viti i kaluar ishte ndër më të ngrohtët e regjistruar, me temperaturë mesatare rreth 1.43 gradë Celsius mbi nivelet para-industriale. Mbi 91% e energjisë së tepërt depozitohet në oqeane, ku ritmi i ngrohjes është më shumë se dyfishuar në dekadat e fundit.