Erisa Xhixho, zëvendëspresidentja e Partisë së Lirisë, komentoi në emisionin News24 Fundjavë protestën e opozitës, të zhvilluar më 20 shkurt para Kryeministrisë.
Ajo vuri në dukje se protesta pati pjesëmarrje të jashtëzakonshme, por u përball me dhunë të njëanshme. Sipas saj, në protestë u panë persona të infiltruar, ndërsa në selinë e Partisë Demokratike u hodh gaz lotsjellës. Demokratët, sipas Xhixhos, u kërcënuan dhe u mbajtën nën terror nga policia.
Xhixho përmendi se dy ditë më parë, në Kuvend, opozita paraqiti alternativa nga TVSH-ja për ushqimet, siguria ushqimore, propozimet e deputetes Tabaku për minatorët, për akcizën dhe pagat e mësuesve. Këto, sipas saj, u refuzuan nga mazhoranca.
Ajo u shpreh se opozita duhet të përmirësohet dhe të japë më shumë mesazhe për vizionin e saj. Xhixho iu referua edhe deklaratës së ministres, e cila mohoi përgjegjësinë për dhunën në protestë.