Presidenti kinez Xi Jinping mbërriti në Phenian të hënën, në një vizitë që shënon përpjekjen e Kinës për të rivendosur ndikimin e saj mbi aleatin strategjik. Kjo është vizita e parë e kreut të shtetit kinez në Korenë e Veriut pas shtatë vitesh. Gjatë takimeve, palët u zotuan për të forcuar komunikimin strategjik përmes shkëmbimeve të shpeshta të delegacioneve.
Sipas agjencisë shtetërore të lajmeve KCNA, liderët miratuan një "plan afatgjatë" për zhvillimin e marrëdhënieve dypalëshe. Kim Jong Un rikonfirmoi mbështetjen për parimin e "Një Kine", duke theksuar solidaritetin mes dy vendeve përballë ndryshimeve në situatën ndërkombëtare. Retorika zyrtare vuri theksin te "miqësia revolucionare" mes dy kombeve.
Analistët vlerësojnë se kjo lëvizje e Pekinit ndërlidhet me dinamikat gjeopolitike. Kina po përpiqet të ruajë ndikimin mbi Phenianin pas shqetësimeve në rritje lidhur me partneritetin në zhvillim midis Koresë së Veriut dhe Rusisë.
Fokusi i vizitës u shtri edhe te fusha e sigurisë dhe mbrojtjes. Mediet kineze raportuan se presidenti Xi shprehu interes për thellimin e bashkëpunimit diplomatik dhe të sigurisë, duke nxitur hamendësime se Kina kërkon të monitorojë nga afër zhvillimet në Korenë e Veriut. Për Phenianin, mbështetja nga Pekini mbetet thelbësore për stabilitetin ekonomik dhe diplomatik.