Mesfushori i kombëtares shqiptare Ylber Ramadani ka rrëfyer rrugëtimin e tij drejt Serie A në një dokumentar të kanaleve zyrtare të kampionatit italian. Ai lindi në Gjermani, por familja u kthye në Kosovë, ku përjetuan vështirësi të mëdha gjatë luftës. Ramadani ndihmoi babanë në shitjen e frutave, ndërsa i ati fillimisht nuk pranonte që ai të merrej me futbollin. Më pas, babai u bë mbështetësi i tij kryesor.
Karriera e Ramadanit është karakterizuar nga lëvizje në vende dhe kultura të ndryshme, si Danimarka dhe Skocia. Tani te Lecce prej tre vitesh, ai ndihet plotësisht i ambientuar. “Luaj te Lecce dhe ndihem si në shtëpi. Ka plazh, diell dhe gjithçka”, u shpreh mesfushori. Ai është titullar i rëndësishëm në skuadrën e trajnerit Eusebio Di Francesco dhe kontrata e tij pritet të zgjatet automatikisht.
Ramadani pranon presionin e madh për të shmangur rënien nga kategoria. “Kur ndeshjet nuk shkojnë sipas dëshirës, presioni rritet shumë. Megjithatë, jam i lumtur këtu dhe kam mësuar shumë”, tha ai. Tifozët e Lecce-s e kanë kthyer në idhull bashkë me Medon Berisha-n, duke u dedikuar një këngë kushtuar Shqipërisë.
Mesfushori vlerëson cilësitë e rralla të bashkëkombasit. “Medon Berisha ka goditje dhe kualitet që pak lojtarë e kanë në Serie A. Krijon shumë raste dhe na mungon shumë në skuadër”, theksoi Ramadani, duke shprehur shpresën për rikthimin e tij të shpejtë.