Prokuroria pranë Gjykatës së Shkallës së Parë në Shkodër ka zbardhur detaje të hetimit për vrasjen e shtetasit Pavlin Preka, e ndodhur më 26 shkurt 2025. Nga hetimet e deritanishme, nuk rezulton asnjë konflikt apo pistë tjetër motivuese, përveç përpjekjeve të viktimës për të qenë me vajzën e të dyshuarit Vasel Koçeku dhe refuzimit të këtij të fundit për t’i dhënë dorën e saj. Emisioni 'Në Shënjestër' ka publikuar dëshminë e Arsina Koçeku, 13-vjeçares vajzë e të dyshuarit, e cila u shpreh se nuk kishte asnjë kontakt me të riun.
Sipas dëshmisë së Arsinës, ajo nuk e kishte njohur më parë Pavlin Preka. Ajo tregoi se dy ose tre vite më parë, ai kishte ardhur bashkë me xhaxhain e tij në banesën e tyre, ku u prit nga babai i saj, por ajo nuk kishte dijeni për arsyen e vizitës në atë kohë. Motivin e mësoi një vit më vonë, kur babai e pyeti nëse kishte pasur ndonjë kontakt me të, gjë që ajo e mohoi. Arsina theksoi se nuk kishte komunikuar kurrë me të, as në rrjetet sociale. Për vrasjen, ajo mësoi nga një postim në Instagram nga një prej djemve të dajës së saj, që shkruante se ai ishte ndarë nga jeta, por nuk kishte dijeni për konflikte midis babait ose kushërinjve të saj dhe viktimës. Në familje, ngjarja nuk ishte diskutuar.
Lidhur me Klaudio Lisaj, kushëririn e saj, Arsina tha se e njeh dhe kanë marrëdhënie të mira, por nuk di për njohjen e tij shoqërore me viktimën. Për babain e saj, Vasel Koçeku, ajo shpjegoi se ai qëndron kryesisht në shtëpi për shkak të profesionit si shofer ambulance urgjence, duke u larguar vetëm kur ka thirrje urgjente për të ndihmuar persona të sëmurë. Nga hetimet, del se ditën e ngjarjes ka pasur komunikim të drejtpërdrejtë midis viktimës dhe të dyshuarit Klaudio Lisaj.
Megjithatë, përgjimet ambientale midis Arsinës dhe nënës së saj, Age Koçeku, ofrojnë një panoramë tjetër të ngjarjes. Këto biseda përmbajnë interes për autorët e dyshuar, rrethanat dhe motivet. Ndërsa midis Vasel Koçeku dhe Klaudio Lisaj, nuk ka pasur asnjë komunikim. Dhjetë muaj pas krimit, prokuroria nxori urdhër ndalimi për Vasel Koçeku dhe Klaudio Lisaj, të akuzuar për veprën penale 'Vrasje me paramendim', të kryer në bashkëpunim. Të dyshuarit refuzuan të jepnin sqarime gjatë ndalimit.