Kombëtarja shqiptare mësoi kundërshtarët në edicionin e ri të Ligës së Kombeve të UEFA-s, pas shortit të zhvilluar mbrëmjen e së enjtes në Bruksel. Të pozicionuar në Ligën C, Grupi C1, kuqezinjtë do të luajnë kundër Bjellorusisë, Finlandës dhe San Marino. UEFA zyrtarizoi kalendarin e ndeshjeve, që fillon më 26 shtator 2026.
Kalendari i ndeshjeve
• 26 shtator 2026, ora 20:45: Shqipëri – Bjellorusi (shtëpi)
• 29 shtator 2026, ora 20:45: San Marino – Shqipëri (transfertë)
• 3 tetor 2026, ora 15:00: Finlandë – Shqipëri (transfertë)
• 6 tetor 2026, ora 20:45: Shqipëri – San Marino (shtëpi)
• 12 nëntor 2026, ora 20:45: Shqipëri – Finlandë (shtëpi)
• 15 nëntor 2026, ora 18:00: Bjellorusi – Shqipëri (transfertë)
Stadiumi për ndeshjet në shtëpi ende nuk është përcaktuar, por Air Albania, Elbasan Arena dhe Loro Boriçi janë në kushte për t'i pritur.
Ky edicion sjell një risi në kalendarin ndërkombëtar: UEFA ka bashkuar dritaret e shtatorit dhe tetorit në një periudhë të vetme, ku kombëtaret zhvillojnë katër ndeshje nga 24 shtatori deri më 6 tetor. Dy takimet e fundit luhen në periudhën 12–17 nëntor. Ky format synon të ulë ngarkesën e udhëtimeve për lojtarët, pas konsultimeve me klubet europiane.
Nëse Shqipëria renditet e para në grup, ngjitet në Ligën B dhe merr të drejtën për play-off të Euro 2028, që zhvillohet në Mbretërinë e Bashkuar dhe Irlandë.