Ekspertët e sigurisë kibernetike kanë zbuluar një mjet hakerimi të quajtur Coruna, i cili mund të marrë kontrollin e pajisjeve iPhone në mënyrë të fshehtë. Ky spyware u identifikua për herë të parë nga studiuesit e Google Threat Intelligence Group (GTIG), të cilët ndanë gjetjet e tyre të martën. GTIG e ka monitoruar mjetin që nga viti 2025.
Spyware-i prek pajisje që përdorin iOS nga viti 2019 deri në fund të 2023-ës. Paketa e Coruna përmban mbi 20 dobësi sigurie, të cilat lejojnë depërtimin në pajisjet Apple dhe anashkalimin e mbrojtjeve të brendshme. Sulmi shfrytëzon kryesisht shfletuesin Safari dhe aktivizohet kur përdoruesi hap një lidhje ose faqe të dëmshme.
Pasi aktivizohet, Coruna vjedh pjesë të mesazheve, fotografi, shënime dhe të dhëna financiare, përfshirë llogari bankare dhe fraza rikuperimi për kriptomonedha. Në disa raste, mund të shkarkojë module shtesë për të sulmuar portofolët digjitalë dhe aplikacionet financiare.
Historikisht, mjeti është përdorur në sulme të targetuara nga grupe inteligjence të huaja. Në korrik 2025, një grup spiunazhi rus e përdori kundër faqeve ukrainase, ndërsa hakerë kinezë dyshohet se e shpërndanë përmes platformave të rreme të kriptomonedhave. Firma iVerify spekulon se Coruna mund të ketë lindur si mjet survejimi i qeverisë amerikane, i cili më pas u rrjedh.
Për mbrojtje, ekspertët këshillojnë përdoruesit e prekur të përditësojnë menjëherë pajisjet në versionet më të fundit të iOS, të cilat përfshijnë korrigjime për dobësitë e shfrytëzuara. Për pajisje që nuk mund të përditësohen, rekomandohet aktivizimi i Lockdown Mode, një veçori që pengon sulmet e avancuara.