Volodymyr Zelensky, presidenti i Ukrainës, deklaroi se vendi i tij do të vazhdojë të zgjerojë rrezen e sulmeve ndaj Rusisë, deri në mbi 1500 kilometra brenda territorit rus. Ai e bëri të ditur në një postim në rrjetin X, ku postoi një video me tym që ngrihej në qiell nga një objektiv i goditur, pa e specifikuar atë.
Shërbimi i Sigurisë i Ukrainës (SBU) njoftoi se dronët e tij kishin kryer një sulm të suksesshëm ndaj një stacioni pompimi nafte ruse pranë qytetit të Permit, në një distancë rreth 1500 kilometra nga Ukraina. Zelensky e cilësoi këtë si "një fazë të re në përdorimin e armëve ukrainase për të kufizuar potencialin e luftës ruse".
Në javët e fundit, Ukraina ka intensifikuar sulmet brenda Rusisë, duke synuar rafineritë e naftës, depot dhe portet për të dëmtuar burimin kryesor të financimit të Moskës për luftën. Të martën, një sulm me dron shkaktoi zjarr të madh në rafinerinë e naftës në portin Tuapse të Detit të Zi, i treti ndaj këtij objekti në më pak se dy javë.
Presidenti rus Vladimir Putin e përshkroi si provë të rritjes së sulmeve ukrainase ndaj objektivave civile. Ministria e Mbrojtjes e Ukrainës raportoi se që nga viti 2022, kur Rusia nisi pushtimin, rrezen e sulmeve ukrainase ndaj Rusisë është rritur me 170%. Ukraina ka zhvilluar armë me rreze të gjatë veprimi, të prodhuara brenda vendit, duke synuar industrinë ushtarake, logjistikën dhe eksportet e naftës ruse.