Presidenti i Ukrainës, Volodymyr Zelensky, ka kërkuar zyrtarisht nga Shtetet e Bashkuara dhënien e një licence për prodhimin e sistemeve të mbrojtjes ajrore Patriot brenda territorit ukrainas. Kërkesa pason sulmet e fundit ajrore të Rusisë mbi kryeqytetin Kiev, duke e bërë forcimin e mbrojtjes ajrore një prioritet absolut për vendin.
“Është veçanërisht e rëndësishme që marrëveshjet tona me SHBA-në për prodhimin e raketave antibalistike të kalojnë në fazën e zbatimit. Ne mbështetemi shumë te vendimi i Shteteve të Bashkuara për licencat e Patriot dhe bashkëpunime të tjera, pasi kjo është ajo që mund të ndalojë luftën dhe sulme të ngjashme”, deklaroi Zelensky.
Aktualisht, Ukraina përdor sisteme Patriot të siguruara nga partnerët perëndimorë gjatë luftës. Këto sisteme janë të vetmet në arsenalin ukrainas të afta për të neutralizuar raketat balistike të Rusisë, megjithatë autoritetet kërkojnë të zhvillojnë kapacitete të pavarura prodhimi. Presidenti amerikan, Donald Trump, ka deklaruar muajin e kaluar se administrata e tij do të shqyrtojë kërkesën për mundësimin e prodhimit të këtyre sistemeve nga ana e Ukrainës.