Volodymyr Zelensky, presidenti i Ukrainës, ka njoftuar se një delegacion amerikan do të udhëtojë sot drejt Moskës, pas përfundimit të takimit të tij me presidentin amerikan Donald Trump.
Sipas deklaratës së tij, ekipi ukrainas do të takohet fillimisht me përfaqësuesit e Shteteve të Bashkuara, ndërsa më pas, duke nisur nga dita e nesërme, do të zhvillohet një takim trepalësh dyditor mes Ukrainës, Rusisë dhe SHBA-së në Emiratet e Bashkuara Arabe.
Zelensky ka theksuar se Rusia duhet të jetë e gatshme për kompromise dhe se kjo nuk është përgjegjësi vetëm e Ukrainës. “Të gjithë duhet të jenë të gatshëm, jo vetëm Ukraina”, ka deklaruar ai, duke nënvizuar se dialogu është më i dobishëm se mungesa e tij.
Ai ka shprehur shpresën për ndërprerjen e luftës: “Zoti e bekoftë, lufta do të përfundojë, shpresoj që po”. Kjo deklaratë është bërë gjatë një daljeje në Davos, sipas burimeve.