Presidenti i Ukrainës, Volodymyr Zelensky, ka paralajmëruar qytetarët se, bazuar në të dhënat e inteligjencës, Rusia mund të ndërmarrë një tjetër valë sulmesh masive gjatë natës. Ai u ka bërë thirrje qytetarëve që të ndjekin me vëmendje udhëzimet e sigurisë.
Zelensky pranoi se kapacitetet aktuale të mbrojtjes ajrore të Ukrainës nuk janë të mjaftueshme për të neutralizuar një pjesë të konsiderueshme të raketave, duke sjellë pasoja shkatërruese. Në lidhje me sulmet e fundit, presidenti konfirmoi se janë shënuar 22 viktima, ndër të cilët 2 fëmijë, ndërsa 130 persona të tjerë kanë mbetur të plagosur.
Duke theksuar nevojën për mbështetje ndërkombëtare, Zelensky i kërkoi partnerëve në Evropë intensifikimin e furnizimeve me raketa, sisteme të mbrojtjes ajrore dhe informacione jetësore. Ai shtoi se Evropa ka nevojë për një sistem të unifikuar dhe të fuqishëm të raketave antibalistike për të garantuar mbrojtje nga kërcënimet aktuale dhe të ardhshme. Presidenti konfirmoi se do të vijojnë negociatat dhe takimet diplomatike për të forcuar këto mekanizma mbrojtëse.