Presidenti i Ukrainës, Volodymyr Zelensky, ka vlerësuar se situata ushtarake në front është më e favorshme për Kievin në dy vitet e fundit. Në një intervistë për gazetën britanike The Guardian, ai theksoi se megjithëse nuk mund të konfirmohet se Rusia po e humb luftën, ajo po humbet avantazhin strategjik dita-ditës.
Sipas Zelensky, forcat ruse pësojnë mbi 30 mijë humbje në muaj, mes të vrarëve dhe të plagosurve rëndë. Ai vlerësoi suksesin e sulmeve ukrainase me dronë ndaj objektivave strategjikë në Shën Petersburg dhe Krime, të cilat kanë shkaktuar dëme në terminalet e naftës dhe infrastrukturën logjistike të forcave ruse.
Përkundër humbjeve në terren, Zelensky bëri të ditur se Rusia ka intensifikuar sulmet ajrore. Vetëm javën e fundit, Moska raportohet të ketë lëshuar 73 raketa dhe 656 dronë ndaj objektivave ukrainas, duke shkaktuar 18 viktima në Kiev dhe Dnipro, përfshirë një fëmijë trevjeçar.
Sa i përket përpjekjeve për paqe, Zelensky zbuloi se i ka propozuar presidentit rus Vladimir Putin një takim të drejtpërdrejtë për të diskutuar përfundimin e konfliktit. Sipas tij, kjo ofertë është refuzuar nga Kremlini, i cili vazhdon të insistojë në kërkesat e tij territoriale. Presidenti ukrainas e akuzoi më tej Putin për shpërndarje të narrativave të pavërteta me qëllim mbajtjen e kohezionit shoqëror në Rusi. Në rrafshin ndërkombëtar, Zelensky vërejti një rënie të ndikimit politik të Rusisë, duke përmendur dështimin e kandidatëve pro-rusë në Hungari, Moldavi dhe Armeni.