Presidenti i Ukrainës, Volodymyr Zelensky, ka njoftuar se pala ruse ka refuzuar disa mundësi për takime të nivelit të lartë, të cilat synonin gjetjen e një zgjidhjeje për përfundimin e luftës. Sipas kreut të shtetit ukrainas, këto nisma u ndërmorën në konsultim me partnerë ndërkombëtarë, përfshirë Shtetet e Bashkuara dhe Francën.
Në mesin e propozimeve të refuzuara nga Moska figuron mundësia e një takimi në kuadër të samitit të G7. Gjithashtu, Zelensky ka deklaruar se i ka propozuar presidentit amerikan, Donald Trump, zhvillimin e një takimi në territorin e Shteteve të Bashkuara. Ky format, sipas presidentit ukrainas, ishte menduar si një përpjekje për ta bërë më të vështirë refuzimin e dialogut nga ana e presidentit rus, Vladimir Putin.
“Ne i ofruam mundësinë për t’u takuar kudo që mund të merreshin vendime konkrete për t’i dhënë fund luftës. Ai nuk pranoi”, u shpreh Zelensky. Duke folur për hapat e ardhshëm, presidenti theksoi se nëse Rusia nuk tregon gatishmëri për negociata, do të kërkohet shtimi i presionit diplomatik ndaj saj.