Deputeti i Lidhjes Demokratike të Kosovës, Armend Zemaj, ka adresuar kritika të ashpra ndaj menaxhimit të sektorit të shëndetësisë në vend. Përmes një reagimi, ai ka theksuar se qindra pacientë që vuajnë nga kanceri po përballen me mungesë të barnave për terapi në institucionet publike, duke u detyruar t'i sigurojnë ato me shpenzimet e tyre.
Sipas Zemajt, kjo situatë është paradoksale pasi për furnizimin me barna janë ndarë miliona euro përmes proceseve të tenderimit. Ai ka pretenduar se në sektorin farmaceutik është krijuar një monopol i madh, i cili gjeneron fitime të larta për kompani të caktuara. Deputeti theksoi se këto kompani janë të lidhura me zyrtarë të Ministrisë së Shëndetësisë dhe ish-vartës të këtij sektori.
"E kemi thënë vazhdimisht se ka para më shumë, por ka monopol të madh, nga i cili ka fitime të mëdha për kompani të veçanta farmaceutike të lidhura me pushtetin, direkt me udhëheqës në MSh, e ish-vartës të këtij sektori jetik, ndërsa për pacientët ka shumë më pak barna", ka shkruar Zemaj.
Po ashtu, deputeti e ndërlidhi këtë problematikë me zhvillimet aktuale politike. Ai vlerësoi se shumica parlamentare nuk ka interes për konstituimin e Kuvendit, pasi dëshiron të shmangë mbikëqyrjen parlamentare mbi mënyrën se si po menaxhohen fondet dhe shërbimet publike. Sipas tij, mungesa e barnave mbetet një barrë e rëndë për familjet dhe xhepat e qytetarëve të Kosovës.