Në kryeqytetin e Estonisë, Tallinn, u mbajtën konsultimet politike ndërmjet delegacionit të Kosovës dhe atij të Estonisë, me synim forcimin e bashkëpunimit ndërinstitucional mes dy vendeve. Delegacionet u kryesuan nga Ilir Muçaj, Sekretar i Përgjithshëm i Ministrisë së Punëve të Jashtme dhe Diasporës së Kosovës, dhe Siiri Königsberg, Drejtore e Përgjithshme për Çështje Evropiane në Ministrinë e Punëve të Jashtme të Estonisë.
Gjatë takimeve, palët shqyrtuan mundësitë për zgjerimin e bashkëpunimit në fusha të ndryshme strategjike, duke përfshirë zhvillimin digjital, inovacionin, arsimin dhe sektorin e mbrojtjes. Përveç bashkëpunimit dypalësh, agjenda përfshiu shkëmbimin e pikëpamjeve për procesin e integrimit euro-atlantik të Kosovës, perspektivën evropiane të rajonit dhe zhvillimet aktuale në Ballkanin Perëndimor.
Në kuadër të vizitës, u organizua një drekë pune nga Martin Roger, Zëvendëssekretar për Çështje Politike në MPJ-në e Estonisë. Gjatë këtij bashkëbisedimi u trajtua situata gjeopolitike në Evropë, me theks te ndikimi i agresionit rus në Ukrainë mbi sigurinë e kontinentit. Përfaqësuesit diskutuan edhe mbi bashkëpunimin në organizatat ndërkombëtare, duke përfshirë çështjet që lidhen me Këshillin e Evropës. Pala estoneze rikonfirmoi mbështetjen për perspektivën evropiane të Kosovës, ndërsa të dyja palët u dakorduan për vazhdimin e dialogut të rregullt politik.