Një zjarr i fuqishëm përfshiu dje një pallat në kompleksin rezidencial tek Farmacia 10, pranë QSUT-së në Tiranë. Ngjarja ndodhi gjatë ditës së 14 prillit 2026, duke shkaktuar dëme të konsiderueshme materiale.
Mëngjesin e sotëm, pamjet nga vendngjarja tregojnë fasadën e ndërtesës të djegur pothuajse tërësisht. Sipas informacioneve paraprake, rreth 30 apartamente dyshohet se janë shkrumbuar, ndërsa bilanci i saktë i dëmeve pritet të përcaktohet gjatë ditës.
8 persona u asfiksuan nga tymi, mes tyre 6 zjarrfikës dhe 2 qytetarë. Në shuarjen e zjarrit u angazhuan forcat e emergjencës dhe 2 helikopterë Cougar, ndërsa operacioni zgjati disa orë.
Autoritetet dhe grupet e emergjencës vazhdojnë punën në terren për vlerësimin e plotë të situatës. Hetimet po kryhen për të zbardhur shkaqet dhe rrethanat e ngjarjes.