Zjarr masiv në pyllin e Dërmenasit, Fier

Një zjarr masiv ka përfshirë pyllin e Dërmenasit, në afërsi të grykëderdhjes së lumit Seman në Fier. Sipas informacioneve paraprake, zjarri është aktiv në dy vatra të ndodhura në anën veriore të lumit. Era e fortë që mbizotëron në zonë po favorizon përhapjen e flakëve drejt një masivi pyjor me pisha, duke vështirësuar ndërhyrjen e forcave zjarrfikëse. Në vendngjarje ndodhen shërbimet e zjarrfikësve të Fierit, të cilët janë duke punuar intensivisht për izolimin, vënien nën kontroll dhe shuarjen e vatrave të zjarrit. Situata mbetet në monitorim të vazhdueshëm për shkak të kushteve atmosferike që ndikojnë në shpejtësinë e përparimit të flakëve.