Gjatë protestës së 14 tetorit në Tiranë, protestuesit i vunë flakën dy kamionçinave të Bashkisë së Tiranës në dalje të Rrugës së Durrësit. Zjarre u raportuan edhe në godinën e Dhomës së Tregtisë dhe Industrisë, në një bankë, në koshat e mbeturinave në Rrugën e Kavajës dhe në një ndërtesë të braktisur pranë Ministrisë së Arsimit. Zjarrfikësit ndërhynë për shuarjen e këtij zjarri, ndërsa policia përdori ujë me presion dhe gaz lotsjellës për të shpërndarë turmën.
Sipas BoldNews, në zonën e Rrugës së Durrësit protestuesit dëmtuan kangjella dhe objekte të tjera përgjatë rrugës, si dhe bllokuan qarkullimin e automjeteve. NOA raportoi se automjetet e bashkisë ndodheshin aty për pastrimin e rrugës. Sipas kët këtij burimi, tymi dhe rreziku nga flakët bënë që banorë dhe qytetarë të largoheshin nga vendi.
Top Channel, Telegraf, Mapo dhe Java News raportuan për zjarr në godinën e Dhomës së Tregtisë dhe Industrisë, si dhe në një bankë e në koshat e mbeturinave në Rrugën e Kavajës. Top Channel dhe Telegraf thanë se automjetet që tentuan të kalonin në rrugë u përballën me vështirësi. Sipas Top Channel, protestuesit ishin shpërndarë në disa vende të kryeqytetit.
Incidente në zona të tjera
Koha Jone raportoi se protestuesit shkatërruan një bankomat pranë Katedrales së Shën Palit. Sipas të njëjtit burim, ata sulmuan një kioskë në kryqëzimin e Rrugës së Elbasanit dhe morën sende nga brenda saj. Në rrugë u hodhën një frigorifer, kangjella hekuri dhe pllaka.
BoldNews raportoi se protesta vijonte përgjatë Bulevardit “Dëshmorët e Kombit”, pranë Parlamentit dhe në zonën e Rrugës së Elbasanit. Sipas këtij burimi, policia po ndërhynte në zonat ku ishin regjistruar incidente dhe raportoheshin arrestime protestuesish. Teve1 raportoi gjithashtu se kryeministri Edi Rama i tha Reuters se nuk do të japë dorëheqjen.
NOA i përshkroi ngjarjet në Rrugën e Durrësit si pjesë të një serie përplasjesh dhe aktesh të dhunshme gjatë ditës, me sulme ndaj institucioneve, bizneseve private dhe mjeteve të ndryshme.
Përditësime
Zjarrfikësit ndërhynë në një ndërtesë të braktisur pranë Ministrisë së Arsimit, ndërsa policia përdori ujë me presion dhe gaz lotsjellës.
Protestuesit shkatërruan një bankomat pranë Katedrales së Shën Palit dhe sulmuan një kioskë në kryqëzimin e Rrugës së Elbasanit, raportoi Koha Jone.