Situata e zjarreve në qarkun e Lezhës mbetet kritike, me vatra të reja që shtohen orë pas ore. Në zonën malore të Manatisë, forcat zjarrfikëse po vijojnë ndërhyrjen nga ajri me helikopter prej orës 08:00 të mëngjesit për të vënë flakët nën kontroll. Ndërkohë, një vatër e re është aktivizuar në fshatin Rrilë, ku forcat zjarrfikëse janë angazhuar urgjentisht për të frenuar përhapjen e flakëve që i ishin afruar banesave. Përpjekjet në terren mbështeten nga kushtet e vështira të krijuara nga thatësira tremujore dhe erërat e forta.
Bilanci i dëmeve deri më tani është i konsiderueshëm. Në Piraj, dy shtëpi të pabanuara janë shkatërruar, ndërsa raportohen dëme edhe në një kasolle bagëtish, linjën hekurudhore dhe sipërfaqe të mëdha me pemë. Ndërkohë, zjarret në Piraj dhe Gramëz të Krujës tashmë janë vënë plotësisht nën kontroll.
Kryetari i Bashkisë së Lezhës, Pjerin Ndreu, ka mbajtur një takim urgjent me prefektin, drejtuesit e Policisë së Shtetit, përfaqësues të SHISH dhe strukturat e emergjencave. Gjatë takimit u analizua situata dhe u ngritën dyshime të forta se zjarret mund të jenë të qëllimshme. Ndreu ka bërë apel për kujdes maksimal, duke kërkuar bashkëpunimin e qytetarëve për të mos ndezur zjarre në ambiente të hapura, pasi çdo papërgjegjshmëri rrezikon jetën e banorëve dhe pronat e tyre.
Emergjencat nga zjarret mbeten aktive edhe në zona të tjera të vendit, ku raportohen vatra në:
- Galush dhe Gjevurë të Peqinit.
- Vend-depozitimet e mbetjeve në Bulqizë dhe Klos.
- Pranë Parkut Arkeologjik të Apolonisë në Fier.
Përditësime
Forcat zjarrfikëse po ndërhyjnë në fshatin Rrilë të Lezhës për të shuar një vatër të re zjarri që rrezikonte banesat.