Një zjarër shpërtheu në një pallat 12-katësh në kompleksin Arlis te Farmacia 10 në Tiranë, pranë Spitalit Nënë Tereza. Vatra e zjarrit nisi në një biznes në katin e parë të ndërtesës, ndërsa fasada e saj ndikoi në përhapjen e flakëve drejt pjesëve të tjera.
Shkëlqim Goxhaj, drejtor i zjarrfikësve të Tiranës, deklaroi se forcat e tij kanë vendosur tre autoshkalla në vendngjarje – dy në aktivitet dhe një në pjesën veriore. "Kemi futur të gjitha mjetet e nevojshme për shuarjen e zjarrit. Nga volumi i zjarrit, ai ka nisur në katin e parë ku ndodhej një biznes. Pas kontrollit të situatës, do të nisë ekspertiza zyrtare nga inspektorët e parandalimit dhe policia gjyqësore", tha Goxhaj. Ai theksoi se forcat janë përqendruar në skajet e vatrave dhe në tarracë, ndërsa deri tani nuk raportohen pasoja fatale.
Anuela Ristani, kryetare e komanduar e Bashkisë së Tiranës, u shpreh pranë vendngjarjes se nuk ka banorë të humbur apo të rrezikuar. "Do të kontrollojmë banesë më banesë për të siguruar mungesën e humbjeve apo dëmtimeve", deklaroi ajo. Forcat e zjarrfikësve kanë evakuuar disa qytetarë nga objekti dhe janë drejt përfundimit të shuarjes së vatrave.