Gjatë mesditës së sotme, një person ende i paidentifikuar i ka vënë flakën një automjeti me targa diplomatike bullgare, i cili ishte i parkuar në afërsi të Ambasadës së Bullgarisë në Shkup. Flakët kanë dëmtuar edhe një automjet të dytë diplomatik që ndodhej pranë vendit të ngjarjes. Sipas mediave lokale, autori dyshohet të jetë një person i ri, ndërsa policia e Maqedonisë së Veriut ka nisur hetimet për zbardhjen e rrethanave dhe identifikimin e tij.
Qeveria e Maqedonisë së Veriut reagoi përmes një deklarate zyrtare, duke e dënuar aktin si një veprim vandalizmi të papranueshëm. Institucionet theksuan se çdo përpjekje për të provokuar tensione ose për të cenuar marrëdhëniet diplomatike do të ndëshkohet me ashpërsi.
Nga ana tjetër, Ministria e Jashtme e Bullgarisë e ka cilësuar këtë sulm si një akt të qëllimshëm agresioni. Në reagimin e saj, Sofja vuri në dukje rrezikun e drejtpërdrejtë për jetën e personelit të ambasadës, duke shtuar se incidenti mund të kishte pasur pasoja shumë më të rënda nëse nuk do të kishte ndërhyrë menjëherë konsulli bullgar. Autoritetet bullgare e lidhën këtë ngjarje me klimën e tensionuar politike dhe mungesën e reagimit institucional ndaj incidenteve të mëparshme.
Ky incident pason një seri ngjarjesh të tjera të shënuara në muajt e fundit, përfshirë dëmtimin e hyrjes së Ambasadës Bullgare në janar, si dhe sulme ndaj qendrave kulturore bullgare në Manastir dhe Ohër. Marrëdhëniet midis dy vendeve mbeten të ndjeshme për shkak të mosmarrëveshjeve historike dhe atyre mbi procesin e integrimit të Maqedonisë së Veriut në Bashkimin Europian.
Përditësime
Policia e Shkupit ka arrestuar një 44-vjeçar, i dyshuar për zjarrvëniet ndaj automjeteve diplomatike bullgare. Autoritetet kanë siguruar pamje nga kamerat e sigurisë, të cilat dokumentojnë autorin gjatë kryerjes së veprës penale.