Një zyrtar në Republikën Islamike të Iranit ka deklaruar për Reuters se rreth 2.000 njerëz janë vrarë në protestat antiqeveritare të shpërthyera në javët e fundit. Ai theksoi se numri përfshin anëtarë të forcave të sigurisë dhe fajësoi për vdekjet "terroristët", duke përsëritur retorikën zyrtare të Teheranit për shtypjen e protestave.
Sipas Agjencisë së Lajmeve të Aktivistëve të të Drejtave të Njeriut, numri i të vdekurve arrin të paktën 646 në të gjithë vendin. Megjithatë, ndërprerja e vazhdueshme e aksesit në internet e ka bërë të vështirë verifikimin e informacionit, duke sugjeruar se numri i vërtetë mund të jetë më i lartë.
Ministri i Jashtëm iranian Abbas Araghchi shpjegoi për Al Jazeera se qeveria ndërpreu komunikimet me internetin më 8 janar për shkak të "aktiviteteve terroriste" gjatë protestave, të cilat filluan në fund të dhjetorit me kërkesa ekonomike. Ai tha se qeveria po bisedonte me protestuesit, por interneti u ndërpre kur u vunë re urdhra nga jashtë. Aksesi do të rivendoset në koordinim me shërbimet e sigurisë, sipas tij.
Organizata joqeveritare Netblocks raportoi se ndërprerja ka vazhduar për 108 orë deri më 13 janar.
Ndërkohë, Finlanda dhe Spanja kanë thërritur ambasadorët iranianë. Ministrja e Jashtme finlandeze Elina Valtonen shkroi në platformën X se regjimi iranian ka ndërprerë internetin për të shtypur në heshtje dhe se kjo nuk tolerohet, duke shprehur mbështetje për popullin iranian.