Kosova, me 1.5 milionë banorë, ka vetëm një aeroport ndërkombëtar të certifikuar, Adem Jashari në Prishtinë. Brenda territorit të saj ekzistojnë 12 fusha apo pista ajrore, të regjistruara si aerodrome në komunat Drenas, Skënderaj, Rahovec, Malishevë, Prizren, Suharekë, Ferizaj, Gjilan, Istog, Podujevë dhe dy në Klinë.
Këto hapësira u ndërtuan kryesisht mbi toka bujqësore në vitet '70 dhe '80 nga ish-ndërmarrja shoqërore Agro-Kosova, për spërkatje të tokave bujqësore. Karakteristika e përbashkët është madhësia e pistave: 450 metra gjatësi dhe 18 metra gjerësi. Ato nuk shërbejnë për fluturime komerciale dhe nuk kanë status formal regjistrimi apo autorizimi për operime ajrore.
Para luftës së viteve 1998-1999, ato kishin funksion bujqësor të qartë. Sot gjendja është ndryshe: disa janë mbuluar nga mbeturinat, disa janë privatizuar dhe disa përdoren nga auto-shkollat. Degradimi filloi gjatë viteve '90 për shkak të masave të regjimit serb, që ndaluan zhvillimin e aviacionit të përgjithshëm.
Pas luftës së 1999-ës, administrimi kaloi fillimisht te Agjencia Kosovare e Mirëbesimit (AKM) dhe më pas te Agjencia Kosovare e Privatizimit (AKP). Një dokument i publikuar nga Autoriteti i Aviacionit Civil të Kosovës (AAC) në vitin 2015 konfirmon ekzistencën e këtyre fushave dhe gjendjen e tyre infrastrukturore, pa autorizim për përdorim ajror.
Përkufizimi i fushave ajrore
Fusha ajrore është zonë e caktuar mbi tokë për aterrim, nisje dhe lëvizje të mjeteve ajrore. Në Kosovë, shtrirja e tyre ishte planifikuar për të mbuluar të gjitha rajonet.