Duke filluar nga data 1 qershor, Qeveria e Kosovës do të zbatojë "Programin e Mbështetjes së Konektivitetit për sezonin e verës 2026". Ky program synon mbështetjen e linjave ajrore që shërbejnë për mërgatën, duke përfshirë destinacione në Zvicër, Gjermani, Austri, Turqi, Belgjikë, Francë, Suedi, Finlandë, Norvegji dhe Danimarkë.
Mbështetja financiare në vlerë prej 2 milionë eurosh do të alokohet për kompanitë që operojnë përmes Aeroportit Ndërkombëtar të Prishtinës. Subvencionimi do të bëhet pas verifikimit të performancës në fund të sezonit, më 24 tetor 2026. Kompanitë duhet të dorëzojnë orarin operacional për të qenë pjesë e skemës.
Kriteret për përfitim janë:
• 3 euro për pasagjer: Kompania duhet të realizojë të paktën 85% të fluturimeve të planifikuara.
• 6 euro për pasagjer shtesë: Për fluturime mbi orarin bazë, me kushtin që të paktën 80% e kapacitetit të vendeve në avion të jenë të zëna.
• Mbështetje për linja të reja: Kompanitë që hapin destinacione të reja mund të përfitojnë mbështetje nëse plotësojnë kriterin e mbushjes prej 80% të kapacitetit.
Sipas autoriteteve, qëllimi i këtij programi është ruajtja dhe zgjerimi i lidhjeve ajrore me tregjet evropiane dhe përmirësimi i konektivitetit gjatë muajve të verës, periudhë kur kërkesa për udhëtime nga diaspora rritet ndjeshëm.