Louis Pisha, 12-vjeçar me origjinë shqiptare, ka humbur jetën në Bolonjë të Italisë pas rënies nga kati i tetë i një pallati në rrugën Via Piave. Ngjarja ndodhi dje pasdite, ndërsa ai luante me shokët në tarracë. Sipas mediave italiane dhe policisë së komisariatit Santa Viola, i riu hipi mbi një dritare transparente plastike në çati, e cila u thye papritur nën peshën e tij.
Ai mbeti fillimisht i varur dhe shokët u përpoqën ta kapnin për ta ndihmuar, por nuk arritën ta mbajnë. Për pasojë, Louis Pisha ra nga lartësia e tetë kateve dhe vdiq nga traumat e rënda, pavarësisht mbërritjes së menjëhershme të shërbimeve të emergjencës 118, policisë dhe zjarrfikësve. I mituri nuk banonte në atë pallat.
Prindërit dhe të afërmit mbërritën shpejt në vendngjarje. Nëna e tij u shemb në tokë dhe shqiptoi: "Ka vdekur, më thoni çfarë ndodhi".
Policia ka pyetur shokët dhe po heton se si fëmijët hynë në tarracë, si dhe kushtet e sigurisë së strukturës plastike. Kryebashkiaku i Bolonjës, Matteo Lepore, shprehu ngushëllimet: “Marrim me dhimbje lajmin për ndarjen tragjike të një djali 12-vjeçar. Bashkohemi me dhimbjen e familjes dhe shokëve. Si Bashki, jemi në dispozicion për çdo nevojë.”
Zona ka përjetuar ngjarje të ngjashme. Në vitin 2024, 17-vjeçari Fallou Sall humbi jetën nga një goditje me thikë pranë të njëjtit pallat. 16 vjet më parë, një 13-vjeçar ra nga çatia e një shkolle në Zola Predosa përmes një dritareje të thyer.