Në mbrëmjen e së premtes, në rrugën Dhimokratias në periferi të Athinës, ndodhi një aksident rrugor ku një automjet me tre të mitur u përplas me një pemë. Si pasojë, një 15-vjeçar vdiq në vend, ndërsa dy të tjerë u transportuan në spital në gjendje të rëndë, por jashtë rrezikut për jetën.
Sipas mediave greke, njëri prej të miturve kishte marrë fshehurazi çelësat rezervë të makinës së nënës së tij nga çanta. Bashkë me dy shokët e tij, mes tyre një shqiptar, ata qarkulluan me shpejtësi mbi normat e lejuara në rrugët e zonës Luka ose Loutsa. Automjeti doli nga rruga dhe u përplas me një pemë në kryqëzimin me rrugën Sotiros.
Dy të plagosurit u dërguan në Spitalin e Fëmijëve Aglaia Kyriakou, ku do të kryhen ekzaminime si skanime CT dhe rreze X për shkak të dyshimit për goditje në kokë. Ata pritet të shtrohen në klinikën kirurgjikale.
Policia greke ka ndaluar drejtuesin e automjetit në spital, së bashku me prindërit e tij. Trupi i viktimës u dërgua në morg për veprime mjeko-ligjore. Hetimet po kryhen nga policia rrugore e Drejtorisë së Atikës Lindore.
Dëshmitarë okularë raportuan se shoferi bërtiste "çfarë bëra unë" pas përplasjes. Një tjetër dëshmitare tha se ambulancat mbërritën menjëherë dhe njëri fëmijë doli vetë nga makina pas zhurmës së fortë.
Përditësime
Autoritetet greke konfirmuan se shqiptari Eljon Metaj (16 vjeç) vdiq në aksidentin rrugor në Athinë.
Korrigjime:
- Mosha: nga 15 në 16 vjeç.
- Statusi: viktimë e vdekur, jo i plagosur.