Një aksident automobilistik ka ndodhur në orët e para të ditës së enjte në zonën e Glyfadës, në kryeqytetin grek. Automjeti, i cili lëvizte në drejtim të Pireut, doli papritur nga rruga në kryqëzimin e bulevardit Poseidonos me rrugën Kalypsous dhe u përplas me shpejtësi të lartë me murin e jashtëm të një hoteli. Përplasja ka qenë aq e fuqishme sa automjeti u shkatërrua pothuajse plotësisht, duke kërkuar ndërhyrjen e forcave zjarrfikëse me 8 efektivë dhe pajisje speciale për nxjerrjen e pasagjerëve nga rrënojat.
Tre nga pesë personat që ndodheshin në makinë kanë ndërruar jetë në vendngjarje. Sipas raportimeve, viktimat janë të rinj nga qyteti i Fierit me banim në Athinë. Ndërsa autoritetet greke kanë konfirmuar se viktimat janë të moshave 18, 23 dhe 26 vjeç, identitetet e plota nuk janë bërë ende të gjitha publike. Dy të mbijetuarit, të dy 18-vjeçarë, janë transportuar në spitale për trajtim mjekësor, ku njëri prej tyre ndodhet në gjendje kritike për jetën dhe është i intubuar në Njësinë e Kujdesit Intensiv.
Policia Rrugore greke ka nisur hetimet për të zbardhur shkaqet e ngjarjes. Përderisa disa burime përmendin mundësinë e një gare të improvizuar të transmetuar në rrjetet sociale, autoritetet zyrtare, në deklaratat e tyre paraprake, deri më tani nuk raportojnë për përfshirjen e një mjeti tjetër në aksident. Ekspertët po punojnë gjithashtu për të përcaktuar shpejtësinë e mjetit në momentin e përplasjes dhe për të shqyrtuar kamerat e sigurisë në zonë.
Përditësime
Ekipet e shpëtimit kanë finalizuar operacionin e nxjerrjes së viktimave nga automjeti i shkatërruar plotësisht pas përplasjes me murin e betonit në kryqëzimin e bulevardit Poseidonos me rrugën Kalypsous. Operacioni kompleks angazhoi 8 efektivë të shërbimit zjarrfikës dhe 3 automjete speciale për të bërë të mundur shkëputjen e trupave nga mjeti i bërë copash.
Hetuesit grekë po fokusohen te dinamika e përplasjes së ndodhur rreth orës 02:00 të mëngjesit të së enjtes. Dëshmitë nga vendngjarja tregojnë se motori i automjetit u shkëput dhe mori flakë menjëherë pas impaktit me murin. Autoritetet po verifikojnë dyshimet se drejtuesi mund të ketë pasur një përplasje fillestare me një mjet tjetër para goditjes fatale. Gjithashtu, po hetohet pista nëse të rinjtë ishin duke regjistruar një video për rrjetin social TikTok në momentet e fundit. Në zhvillim pozitiv, njëri prej të mbijetuarve ndodhet jashtë rrezikut për jetën.
Hetimet e reja për aksidentin tragjik në Glyfada zbuluan detaje shqetësuese mbi dinamikën e përplasjes. Burime nga media greke MEGA raportojnë se mjeti, një makinë sportive e modifikuar për gara, dyshohet se po merrte pjesë në një garë të transmetuar live në TikTok në momentin e përplasjes. Ekspertët e trafikut vlerësojnë se shpejtësia e mjetit kalonte 150 km/h. Forca e impaktit ishte aq e madhe saqë motori i makinës u shkëput dhe u gjet 30 metra larg pikës së përplasjes, ndërsa pasagjerët u hodhën jashtë kabinës.
Autoritetet greke identifikuan dy prej viktimave të aksidentit të rëndë në Athinë, të moshës 23 dhe 26 vjeç. Hetuesit përcaktuan se ngjarja ndodhi në kryqëzimin e bulevardit Poseidonos me rrugën Kalypsous. Policia po heton një pistë të re, sipas së cilës mjeti mund të jetë përplasur me një makinë tjetër pak para se të godiste murin mbrojtës me shpejtësi të lartë.
Autoritetet greke identifikuan viktimat e aksidentit të rëndë: shoferin 23-vjeçar, pasagjerin 18-vjeçar dhe pasagjerin 26-vjeçar. Policia saktësoi se ngjarja ndodhi rreth orës 02:00 të mëngjesit, ndërsa mjeti po lëvizte në drejtim të Athinës. Hetimet konfirmuan se përplasja ndodhi pasi automjeti doli nga rruga dhe u përplas me gardhin e një hoteli në zonë.
Autoritetet greke kanë identifikuar zyrtarisht tre viktimat e aksidentit fatal në rrugën Poseidonos, pranë Glyfadës. Viktimat janë shoferi 23-vjeçar dhe dy pasagjerët, të moshës 18 dhe 26 vjeç. Ndërkohë, dy të mbijetuarit e këtij aksidenti janë transferuar për trajtim të specializuar mjekësor në Spitalin e Përgjithshëm Shtetëror të Nicës.
Forcat zjarrfikëse angazhuan 8 efektivë dhe 3 automjete për nxjerrjen e personave nga mjeti i aksidentuar. Operacioni i shpëtimit ishte i nevojshëm për shkak të dëmtimeve të rënda të makinës pas përplasjes me strukturën e hotelit.