Gjatë orëve të fundit, tri aksidente rrugore në qytete të ndryshme të vendit kanë sjellë pasoja për jetën dhe shëndetin e qytetarëve.
Në Durrës, një 62-vjeçar nga Kosova, drejtues kamioni, ka humbur jetën në vend pasi u përplas aksidentalisht nga një mjet tjetër i rëndë. Viktima ishte duke lëvizur në këmbë për të dorëzuar dokumentacionin e nevojshëm për kontrollin në skaner kur ndodhi ngjarja fatale.
Ndërkohë, një aksident tjetër i rëndë është regjistruar në aksin nacional Pushimi i Shoferit–Fier Shegan, konkretisht në dalje të fshatit Rrupaj. Përplasja ndodhi midis një automjeti me targa greke dhe një mjeti me targa italiane. Sipas të dhënave paraprake, drejtuesi i mjetit me targa greke tentoi një manovër parakalimi, e cila rezultoi në daljen nga rruga të mjetit me targa italiane, duke përfunduar në një kanal anësor. Tre udhëtarët që ndodheshin në automjetin me targa italiane, një çift bashkëshortësh dhe djali i tyre i rritur, u dërguan për ndihmë mjekësore në Spitalin e Lushnjës me anë të dy ambulancave. Forcat e policisë kanë mbërritur në vendin e ngjarjes për të kryer hetimet dhe për të menaxhuar trafikun në këtë segment, i cili vlerësohet si tejet i ngushtë për volumin e lartë të automjeteve.
Në një ngjarje të veçantë në Korçë, një automjet përplasi karrocën ku ndodhej një foshnjë 1 vjeç e gjysmë. Drejtuesi i mjetit ka transportuar vetë fëmijën drejt spitalit. Sipas burimeve mjekësore, i mituri ndodhet jashtë rrezikut për jetën.