Banka Botërore raporton se 23.4% e popullsisë shqiptare ka jetuar në 2025 me 681 lekë në ditë, e barabartë me 8.3 dollarë. Kjo shifër e vendos Shqipërinë në nivelin më të lartë të varfërisë në rajon, së bashku me Kosovën, tendencë që do të vazhdojë së paku deri në fund të dekadës.
Një e katërta e popullsisë ka ardhura të kufizuara vetëm për mbijetesë bazë. Shërbimet arsimore, shëndetësore dhe qiraja janë të papërballueshme në këtë nivel.
Metodologjia e Bankës Botërore ndan shpenzimet si vijon:
- 60% (400 lekë) për ushqime ditore;
- 40% (281 lekë) për shpenzime të tjera, si faturat e dritave dhe ujit.
Ushqimi me 400 lekë në ditë
Me këtë buxhet, konsumatorët orientohen te produktet bazë pa mish. Shembuj blerjesh ditore:
- Bukë masive: 100-120 lekë;
- Dy vezë: 50-60 lekë;
- Gotë kos ose qumësht: 60-80 lekë;
- Gjysmë kilogram patate ose disa mollë: 50-70 lekë;
- Porcion fasule, oriz ose makarona: 70-90 lekë.
Ky nivel nuk lejon mish viçi ose derri, ëmbëlsira, pije me gaz apo kafe në lokal. Kërkon menaxhim të rreptë për të mbuluar nevojat jetike.