Sistemi shëndetësor në Shqipëri vijon të mbetet dukshëm larg standardeve të vendeve të Bashkimit Europian. Sipas të dhënave të Eurostat për vitin 2025, konsumi individual për shëndetësinë në vendin tonë llogaritet në 662 euro për banor, krahasuar me mesataren prej 3,675 eurosh në BE. Edhe pas korrigjimit të diferencave të çmimeve dhe shprehjes në standardin e fuqisë blerëse (PPS), volumi real i shërbimeve shëndetësore për person është sa 40% e mesatares europiane.
Financimi dhe barra e qytetarëve
Në vitin 2023, shpenzimet korrente për shëndetësinë në Shqipëri përbënin 7.05% të PBB-së, ndërsa në BE kjo shifër ishte 10%, sipas të dhënave të Banka Botërore dhe Organizata Botërore e Shëndetësisë. Problemi bëhet më i dukshëm kur analizohet mënyra e financimit:
- Shqipëria: 48.27% e shpenzimeve mbulohen drejtpërdrejt nga familjet, duke zënë vendin e parë në Evropë për pagesat nga xhepi.
- Maqedonia e Veriut: 39.6% e shpenzimeve mbulohen nga familjet.
- Bullgaria: 35.5% e shpenzimeve mbulohen nga familjet.
- BE: Mesatarja e pagesave direkte është vetëm 14.9%.
Diferenca kryesore me vendet e Bashkimit Europian qëndron te roli i financimit kolektiv. Ndërsa në vendet europiane pjesa dërrmuese e kostove mbulohet nga skemat e detyrueshme të sigurimit dhe buxhetet qeveritare, në Shqipëri familjet vazhdojnë të përballen me një barrë financiare të konsiderueshme, pavarësisht nivelit më të ulët të çmimeve për shërbimet shëndetësore.