Pavarësisht rritjes ekonomike të viteve të fundit, Shqipëria mbetet një ekonomi ku një pjesë e konsiderueshme e burimeve financiare shkon për sigurimin e nevojave bazë. Sipas statistikave të Eurostat, kjo peshë e shpenzimeve nominale për ushqime ka pësuar një rënie të lehtë nga 20.5% në vitin 2024, në 20.4% gjatë vitit 2025.
Ky tregues, që mat vlerën totale të shpenzimeve për ushqime në raport me madhësinë e ekonomisë, tregon se familjet shqiptare detyrohen të orientojnë një pjesë të madhe të të ardhurave drejt ushqimit. Në ekonomitë me të ardhura më të larta, burimet shpërndahen më gjerësisht në strehim, transport, arsim, shëndetësi dhe kulturë.
Në nivel rajonal, situata paraqitet si më poshtë:
- Mali i Zi: 19.9% e PBB-së (nga 19.3% në 2024)
- Bosnjë dhe Hercegovinë: 19.1% e PBB-së (nga 19% në 2024)
- Maqedonia e Veriut: 17.9% e PBB-së (nga 18.2% në 2024)
- Serbia: 12.8% e PBB-së (nga 12.7% në 2024)
Mesatarja për vendet kandidate dhe potencialisht kandidate në rajon, duke përjashtuar Turqinë dhe Kosovën, rezulton të jetë 15.9%, një vlerë rreth 4.5 pikë përqindjeje më e ulët se ajo e regjistruar në Shqipëri. Për Kosovën, të dhënat nuk ishin të disponueshme në tabelat e publikuara.