Një grup prej 26 efektivësh të Forcave të Armatosura kanë filluar një kurs intensiv dhe profesional të gjuhës angleze. Ky trajnim, i cili do të zgjasë 3 muaj, organizohet pranë Departamentit të Gjuhëve të Huaja, në kuadër të Kolegjit të Mbrojtjes dhe Sigurisë, institucion që bën pjesë në strukturën e Ministrisë së Mbrojtjes.
Në ceremoninë e fillimit të kursit, ministri i Mbrojtjes, Ermal Nufi, zhvilloi një bashkëbisedim të hapur me ushtarakët dhe stafin pedagogjik. Ministri Nufi theksoi se, në një mjedis sigurie gjithnjë e më të integruar, zotërimi profesional i gjuhës së huaj dhe veçanërisht aftësia për të përdorur saktë terminologjinë tekniko-ushtarake, përbëjnë një komponent thelbësor të kapaciteteve të personelit ushtarak.
Sipas ministrit, ky formim profesional kontribuon drejtpërdrejt në rritjen e ndërveprueshmërisë së Forcave të Armatosura shqiptare me strukturat e NATO-s. Gjithashtu, trajnimi synon përgatitjen e ushtarakëve për të marrë pjesë me efektivitet në misione dhe angazhime të përbashkëta shumëkombëshe.
Në përfundim të fjalës së tij, ministri Nufi vlerësoi përkushtimin dhe standardin profesional të pedagogëve të Departamentit të Gjuhëve të Huaja në përgatitjen e personelit.