Gjatë muajit prill në Shqipëri u raportuan 34 aksidente rrugore, me pasojë 19 viktima.
Sipas të dhënave zyrtare, këto ngjarje nxjerrin në pah shqetësimin për sigurinë rrugore. Shkaqet kryesore, sipas ekspertëve, përfshijnë sjelljen e drejtuesve të mjeteve, të kombinuar me infrastrukturën dhe sinjalistikën e dobët rrugore.
Të dhënat më të fundit të INSTAT-it për muajin mars 2026 tregojnë 89 aksidente rrugore, ku 117 persona kanë mbetur të vrarë ose të plagosur.
Eksperti i sigurisë rrugore Fation Softa thekson se grupmosha më e prekur është ajo 20-25 vjeç, kryesisht për shkak të mungesës së eksperiencës në drejtim. Ai vlerëson se, më shumë se ashpërsimi i masave, nevojitet rritja e ndërgjegjësimit të drejtuesve për respektimin e rregullave dhe sinjalistikës rrugore.
Softa shton se infrastruktura dhe sinjalistika e dobët në disa akse rrugore luajnë rol të rëndësishëm në këto ngjarje. Siguria rrugore, sipas tij, nuk është vetëm çështje ligjore, por edhe përgjegjësi individuale. Përmirësimi i infrastrukturës dhe edukimi i drejtuesve mbeten hapa kyç për uljen e numrit të viktimave.