Policia e Kosovës, në bashkëpunim me Prokurorinë Themelore në Mitrovicë dhe Drejtoria për Hetimin e Krimit të Organizuar dhe Krimeve të Rënda, ka zhvilluar një operacion të gjerë në rajonet e Mitrovicës, Vushtrrisë, Istogut dhe Skenderajt. Aksioni synon luftimin e skemave piramidale dhe bixhozit të paligjshëm.
Gjatë operacionit janë kontrolluar rreth 50 lokacione, përfshirë lokale afariste dhe shtëpi private. Si rezultat, janë arrestuar 34 persona të dyshuar.
Autoritetet kanë sekuestruar prova materiale, si 170 mijë euro para të gatshme, 5 automjete, armë zjarri dhe pajisje të ndryshme që dyshohet se janë përdorur në veprimtari të paligjshme.
Me vendim të prokurorit, 29 të dyshuar janë dërguar në mbajtje, ndërsa të tjerët janë liruar në procedurë të rregullt.
Në Skenderaj janë kontrolluar 15 lokacione, ku janë arrestuar 8 persona dhe 4 prej tyre janë dërguar në mbajtje.
Policia dhe Prokuroria kanë theksuar angazhimin për vazhdimin e operacioneve kundër krimit të organizuar dhe aktiviteteve të paligjshme që cenojnë rendin dhe sigurinë publike. Qytetarët ftohen të raportojnë rastet e dyshimta përmes kanaleve zyrtare.
Përditësime
Ministri i Punëve të Brendshme, Xhelal Sveçla, ka njoftuar se policia ka sekuestruar 150 mijë euro në Mitrovicë dhe Vushtrri. Aksioni u zhvillua të shtunën në mbrëmje dhe të dielën në mëngjes.
Prokuroria ka kërkuar paraburgim për 27 persona të arrestuar në Vushtrri, Mitrovicë dhe Skenderaj, në kuadër të operacionit policor kundër bixhozit të paligjshëm (34 të arrestuar totalisht).
17 prej tyre paraqiten sot në Gjykatën Themelore në Mitrovicë.
Zëdhënësi Valon Preteni deklaroi: “Për 27 persona kemi bërë kërkesë në Vushtrri, Mitrovicë dhe Skenderaj.”