Gjykata Themelore në Mitrovicë, me degët në Vushtrri dhe Skenderaj, caktoi masën e paraburgimit prej një muaji për tetë persona të dyshuar për organizim të skemave piramidale dhe bixhozit të paligjshëm. Nga këta, gjashtë u dërguan në paraburgim me vendim të Degës në Vushtrri, ndërsa dy të tjerë me vendim të Degës në Skenderaj.
Prokuroria Themelore në Mitrovicë paraqiti kërkesë për caktimin e masës së sigurisë ndaj 27 personave. Seancat u mbajtën sot në Mitrovicë, Vushtrri dhe Skenderaj. Sipas zëdhënësit Valon Preteni, kërkesa u bë për persona të arrestuar në këto zona.
Aksioni u zhvillua më 18 prill nga Prokuroria Themelore në Mitrovicë, në bashkëpunim me Policinë e Kosovës dhe Drejtorinë për Hetimin e Krimit të Organizuar dhe Krimeve të Rënda. Operacioni përfshiu rajonin e Mitrovicës, Vushtrrisë, Istogut dhe Skenderajt.
Gjatë bastisjeve u kontrolluan rreth 50 lokacione, përfshirë lokale afariste dhe shtëpi private. Policia shoqëroi 34 persona të dyshuar. Me vendim të prokurorit, 29 prej tyre u dërguan në mbajtje, ndërsa të tjerët u liruan në procedurë të rregullt.
Si rezultat, u sekuestruan rreth 170 mijë euro para të gatshme, pesë automjete, armë zjarri si dhe pajisje të tjera të dyshuara për përdorim në aktivitete të kundërligjshme.