Një ngjarje e rëndë është raportuar në një spital në Greqi, ku një 35-vjeçare shqiptare, Vjosana Mana, ka humbur jetën pak kohë pasi solli në jetë fëmijën e saj. Lindja ishte planifikuar të kryhej me operacion cezarian më datë 24 qershor.
Bashkëshorti i së ndjerës, Eneo Rushita, në një deklaratë për emisionin "Shqipëria Live", u shpreh se fillimisht procedura mjekësore dukej se kishte shkuar normalisht. Sipas tij, mjekët e njoftuan se pacientja kishte pësuar hemorragji të brendshme, por e siguruan se gjendja ishte nën kontroll.
Rushita pretendon se stafi mjekësor e futi bashkëshorten e tij në një operacion të dytë, gjatë të cilit i hoqën mitrën, pa kërkuar miratimin e tij dhe pa e njoftuar paraprakisht. Ai shton se pavarësisht situatës, nga spitali e kishin siguruar se nuk kishte vend për shqetësim. Gjendja e Vjosana Manës u përkeqësua fatalisht të nesërmen në mëngjes, kur ajo ndërroi jetë. Sipas bashkëshortit, mjekët i kanë komunikuar se mushkëritë e saj ishin mbushur me lëngje.
Familjarët e viktimës kërkojnë zbardhjen e rrethanave dhe sqarimin e procedurave mjekësore të ndjekura nga personeli i spitalit. Deri në këto momente, rezultatet e analizave nuk janë bërë publike, ndërsa familja deklaron se nuk ka marrë ende një përgjigje zyrtare nga autoritetet.