Ilir Kurti, 42-vjeçar nga Skrapari, dyshohet se u vetëhedh në lumin Osum mbrëmjen e djeshme, në vendin Ura e Blezënkës, afër Kanioneve të Osumit.
Në vendngjarje u gjetën motocikli me të cilin lëvizte, sende personale dhe telefoni celular. Pas shqyrtimit të celularit u zbulua mesazhi i fundit i dërguar vëllait: “Po hidhem në lumë vëlla!”.
Ilir Kurti punonte si roje në një hidrocentral në Skrapar. Ai kishte qenë i martuar me një shtetase rumune, me të cilën kishte një djalë. Çifti u nda 7 vite më parë, ndërsa ish-bashkëshortja u largua në Rumaninë dhe prej atëherë ai nuk e kishte takuar apo folur më me të birin.
Sipas familjarëve, ai ishte izoluar prej muajsh në vetvete dhe vuante thellë largimin nga i biri.
Burimet policore konfirmojnë se paraprakisht dyshohet vetëhedhje. Autoritetet po vazhdojnë kërkimet për gjetjen e trupit dhe dokumentimin e rrethanave të plota të ngjarjes.
Përditësime
Kërkimet me polumbarë, përfshirë nga RENEA, filluan sot në mesditë në Kanionet e Osumit.
Dy varka raftingu dhe banorë si dhe familjarë ndihmuan në operacion.
Autoritetet nuk kanë gjetur ende gjurmë të trupit të 42-vjeçarit Ilir Kurti.
Rryma e fortë e lumit dhe errësira pengojnë kërkimet.
Autoritetet dyshojnë se trupi ka ngecur në ndonjë shkëmb; ndryshe, rrjedha mund ta çojë në degëzime të panjohura.
Forcat e Armatosura gjetën atletët e Ilir Kurtit në ujërat e lumit Osum sot në mesditë.
Ushtria po merr pjesë në operacionin e kërkimit në Kanionet e Osumit.