Një ngjarje e rëndë është shënuar në zonën e Urës së Vashës në Klos, ku një 35-vjeçar ka humbur jetën pasi dyshohet se është hedhur nga ura. Viktima është identifikuar si Dritan Lila, banues në fshatin Bastar Murrizë të Tiranës, i cili ishte i martuar dhe baba i një fëmije.
Sipas informacioneve paraprake, 35-vjeçari kishte udhëtuar me automjetin e tij dhe e kishte ndaluar atë pranë urës, e cila ka një lartësi prej rreth 152 metrash. Përpara se të ndërmerrte këtë akt, ai i kishte dërguar një mesazh bashkëshortes së tij, duke e njoftuar për qëllimin e tij. Autoritetet e Policisë dhe ekipet e kërkim-shpëtimit kanë mbërritur në vendngjarje për nxjerrjen e trupit të pajetë nga ujërat.
Autoritetet policore po vijojnë punën për dokumentimin e plotë të rrethanave të ngjarjes, ndërsa dyshohet se i riu po përballej me probleme të rënda emocionale. Dritan Lila punonte prej kohësh në zonën e Rrugës së Arbrit. Hetimet mbeten të hapura për të përcaktuar të gjithë shkaqet që çuan në këtë tragjedi.