Një ngjarje familjare u parandalua në Himarë, ku shtetasi Spiro Dhimaleksi, 35-vjeçar, në gjendje të rënduar psikologjike, kishte izoluar në një dhomë prindërit e tij, përkatësisht 60 dhe 65-vjeç, duke i kërcënuar me thikë se do t'i vriste.
Menjëherë pas njoftimit, forcat e Policisë së Himarës mbërritën në vendngjarje dhe nisën negociata intensive. Pas më shumë se një ore komunikimi, një efektiv policie, banor i zonës, arriti të krijojë kontakt të drejtpërdrejtë dhe uli tensionin.
Gjatë ndërhyrjes, 35-vjeçari tentoi të dëmtojë veten me thikën, duke shkaktuar plagë në bark. Punonjësit e policisë e neutralizuan menjëherë, duke i hequr mjetin prerës dhe duke shpëtuar prindërit pa lëndime.
Ai u shoqërua fillimisht në Komisariatin e Policisë Himarë dhe më pas u transportua në Spitalin Rajonal Vlorë, ku mori ndihmë mjekësore dhe u referua për trajtim psikiatrik. Prindërit u marrën në pyetje nga autoritetet për të sqaruar rrethanat.