Spiro Dhimaleksi, 35 vjeç, mbajti peng prindërit e tij në banesën e tyre në Himarë një ditë më parë. Ai i izoloi babanë 60-vjeçar dhe nënën 65-vjeçare, duke i kërcënuar me thikë për jetën në gjendje të rënduar psikologjike. Refuzoi t’i lironte deri në ndërhyrjen e policisë.
Menjëherë pas njoftimit, forcat e policisë nisën negociatat. Pas më shumë se një ore, një efektiv arriti të komunikonte drejtpërdrejt me Dhimaleksin, duke ulur tensionin. Gjatë ndërhyrjes, ai tentoi të dëmtonte veten me thikë në bark, por policia e neutralizoi shpejt, i hoqi mjetin prerës dhe shpëtoi prindërit pa lëndime.
Pas shoqërimit në Komisariatin e Himarës, Dhimaleksi u trajtua në Spitalin e Vlorës për plagët e vetëshkaktuara. Mjekët psikiatër konstatuan se nuk ka kartelë me diagnozë të problemeve të shëndetit mendor, por rezulton përdorues i lëndëve narkotike në fazë të rënduar. Gjatë komunikimit, ai ishte më i kthjellët dhe do të trajtohet nga toksikologë.
Në dëshminë për policinë, Dhimaleksi deklaroi se veprimin e ndërmori pasi dyshonte se prindërit donin t’i merrnin pronat. Sot, ai është shtruar në Spitalin Psikiatrik “Ali Mihali” në Vlorë për observim dhe kujdes të specializuar. Prindërit janë marrë në pyetje për të sqaruar rrethanat.