Një ngjarje e rëndë ka tronditur mëngjesin e kësaj të enjteje zonën e Porto Palermos në Himarë. Shtetasi Pandeli Mërkuri, 65 vjeç, ka humbur jetën pasi dyshohet se është dëmtuar rëndë nga shpërthimi i një lënde plasëse, të cilën po e përdorte për peshkim të paligjshëm.
Sipas njoftimit zyrtar të Policisë së Shtetit, ngjarja është regjistruar rreth orës 09:00. Lënda shpërthyese, e identifikuar paraprakisht si dinamit ose lëndë artizanale, ka shpërthyer në dorën e 65-vjeçarit, duke i shkaktuar dëmtime të rënda në trup dhe gjymtyrë.
Pas shpërthimit, viktima u transportua me urgjencë drejt Qendrës Shëndetësore të Himarës për të marrë ndihmën e nevojshme mjekësore. Megjithatë, si pasojë e plagëve të marra, 65-vjeçari ka ndërruar jetë gjatë transportimit për në spital.
Menjëherë pas ngjarjes, zona është rrethuar nga shërbimet e Policisë, ndërsa grupi hetimor, nën drejtimin e Prokurorisë, ka nisur veprimet për zbardhjen e plotë të rrethanave. Hetimet po përqendrohen në përcaktimin e llojit të saktë të lëndës plasëse dhe mënyrës së sigurimit të saj, pasi peshkimi me dinamit është një praktikë e ndaluar me ligj, e cila përbën një aktivitet me rrezik të lartë për mjedisin dhe vetë personat që e ushtrojnë atë.
Përditësime
Policia e Shtetit ka identifikuar viktimën e shpërthimit në Himarë si P.M., 65 vjeç. Ngjarja ndodhi në zonën e Porto Palermos, pranë Qeparoit, ku dyshohet se viktima humbi jetën si pasojë e përdorimit të lëndëve plasëse gjatë peshkimit.