Një ngjarje tragjike është regjistruar mesditën e sotme në fshatin Greshicë të bashkisë Mallakastër, ku një 76-vjeçar ka humbur jetën si pasojë e flakëve. Sipas informacioneve zyrtare nga Policia, ngjarja ndodhi rreth orës 12:00, kur shtetasi N. C., i identifikuar nga mediat si Nazif Cenaj, kishte ndezur zjarr në tokën e tij për të djegur mbeturinat.
Flakët kanë dalë jashtë kontrollit, duke përfshirë një ullishte në pronësi të të moshuarit, të favorizuara ndoshta nga era. Në përpjekje për të ndërhyrë dhe për të shuar zjarrin në zonën e përfshirë nga flakët, 76-vjeçari ka ndërruar jetë.
Në vendngjarje kanë mbërritur shërbimet e Policisë dhe forcat zjarrfikëse. Grupi hetimor është duke punuar për sqarimin dhe dokumentimin e plotë të rrethanave të kësaj ngjarjeje, e cila shënon viktimën e parë të shkaktuar nga zjarret në këtë zonë. Ngjarja është konfirmuar edhe nga burime pranë Prefekturës së Qarkut Fier.