Një 33-vjeçar është vënë në pranga nga shërbimet e Komisariatit të Policisë Mallakastër, nën akuzën për veprën penale të “Shkatërrimit të pronës me zjarr”. I arrestuari është shtetasi Dionis Kalemaj, banues në Ballsh, i cili dyshohet se ndezi zjarr për të djegur mbeturina në pronën e tij në fshatin Mollaj.
Era e fortë ka bërë që situata të dalë jashtë kontrollit, duke sjellë përhapjen e flakëve në sipërfaqet përreth. Si pasojë e zjarrit, u shkaktuan dëme në tokat e mbjella me ullinj, ndërsa flakët përfshinë edhe çatinë e një banese të zonës. Ndërhyrja e menjëhershme e shërbimeve të policisë dhe forcave zjarrfikëse bëri të mundur lokalizimin dhe shuarjen përfundimtare të vatrës. Autoritetet konfirmuan se ngjarja nuk shkaktoi lëndime në njerëz.
Në vijim të këtij rasti, Drejtoria Vendore e Policisë Fier ka përsëritur apelin drejtuar qytetarëve për të shmangur djegien e mbetjeve bujqësore apo pastrimin e territoreve përmes zjarrit. Policia theksoi se praktika të tilla, veçanërisht në kushtet e motit me erë, krijojnë rrezik të lartë për përhapje të pakontrolluar, duke rrezikuar jetën, pronën dhe mjedisin.