Prokuroria Themelore në Prizren dhe Policia e Kosovës kanë konfirmuar një rast vrasjeje në fshatin Restelicë të Komunës së Dragashit. Ngjarja ka ndodhur rreth orës 01:06 të 21 janarit 2025. Bazuar në të dhënat fillestare, dyshohet se i dyshuari F.B. ka ushtruar dhunë fizike ndaj nënës së tij T.B., duke e privuar nga jeta në shtëpinë e tyre.
Në vendin e ngjarjes kanë dalë prokurorja kujdestare nga Departamenti për Krime të Rënda, njësi policore, krim-teknikë dhe zyrtarë të Institutit të Mjekësisë Ligjore. Viktima është dërguar për obduksion. Nga ekzaminimi fillestar, nuk është gjetur mjeti i dyshuar i veprës penale, ndërsa viktima ka pësuar lëndime në regjionin e kokës.
Policia e Kosovës, përmes zëdhënësit për rajonin e Prizrenit Shaqir Bytyqi, ka bërë të ditur se i dyshuari, rreth 30-vjeçar, ka pasur probleme të shëndetit mendor. Ai është arrestuar dhe ndaluar për procedura të mëtejshme ligjore.
Prokuroria Themelore në Prizren raporton se i dyshuari ka pasur çrregullime mendore dhe është përfshirë më parë në tre raste penale për dhunë në familje:
- Një rast në vitin 2024;
- Dy raste në vitin 2021.
Për këto raste janë ngritur aktakuza dhe janë dhënë aktgjykime dënuese.
Hetimet vazhdojnë nga Sektori Rajonal i Hetimeve në bashkërendim me prokurorinë, për zbardhjen e plotë të rrethanave dhe shkakut të vdekjes.
Përditësime
Policia ka ndaluar të dyshuarin për 48 orë në lidhje me vdekjen e nënës së tij në Restelicë të Dragashit.
Zhvillimet e reja:
- Viktima kishte lëndime në pjesë të ndryshme të trupit, jo vetëm në kokë.
- Dyshimet tregojnë për konfrontim fizik me duar të thata, pa mjete të forta.
- Të dyshuari iu nënshtrua kontrollit mjekësor.
- Familja është katër-anëtarëshe; dy familjarë të tjerë punojnë jashtë Kosovës.
Faton Alija, Drejtor i Policisë në Prizren, deklaroi: "Dyshimet bazohen në lëndimet e dukshme dhe dëshmitë fillestare, pa shenja të armëve të forta."
Gjykata sqaroi se i dyshuari kishte dy dënime për lëndim të lehtë trupor dhe një për dhunë në familje, jo tre për dhunë siç raportohej më parë.
Zhvillime të tjera:
- Gjykata e obligoi Qendrën për Shëndet Mendor në Prizren të sigurojë trajtim dhe raporte periodike në dy raste.
- Psikologu klinik Ilir Havolli deklaroi se sistemi korrektues në Kosovë ka mangësi të rënda në monitorimin e personave të rrezikshëm.